A "Confederación Española de Centros de Formación y Academias Privadas (CECAP)" é a Organización empresarial representativa en España do Sector da Ensinanza Non Regrada. Os centros de ensinanza asociados a CECAP encóntranse agrupados a través das súas Organizacións membro, con implantación en tódalas Comunidades Autónomas. En CECAP están asociadas toda clase de empresas que imparten Ensinanza e Formación Non Regrada (Idiomas, Oposicións, Escolas de Negocio, Ensinanza a Distancia, Formación Ocupacional e Continua, Seguridade Privada, Recuperacións, Apoio ou Preparación para o Acceso á Ensinanza Regrada, entre outras). Entre os seus principais cometidos figura o de potenciar e coordina-la actividade dos seus membros para a mellor defensa dos seus intereses, así como velar pola calidade da oferta formativa dos centros de formación do país.

Representatividade
A súa expansión nacional e o número de empresas asociadas outórganlle a forza necesaria para impulsar proxectos en beneficio do colectivo e loitar pola resolución de problemas comúns. CECAP é a organización máis representativa do sector e así está recoñecida polos interlocutores sociais. Entre as súas competencias encontrase a de negociar convenios colectivos cos sindicatos e acordos con organizacións patronais ou institucións.

Orixes de CECAP
As orixes de CECAP remóntanse ó ano 1988, cando numerosos Centros de Ensinanza Non Regrada, pertencentes a diversas provincias españolas, sentiron a necesidade de unirse para defende-los seus intereses. Así xurde a Asociación Española de Academias que, posteriormente, se transformará en Federación (FEAP) e que, debido o seu crecemento continuo, á diversificación das ensinanzas recollidas no seu seo, e ó fortalecemento das súas estructuras territoriais, en 1995 constituíuse como "Confederación Española de Centros y Academias Privadas (CECAP)". Na actualidade, e baixo a denominación de "Confederación Española de Centros de Formación y Academias Privadas", esta Organización presentase como a lexítima representante da Formación Non Regrada, formando parte como tal da CEOE e CEPYME.

Composición e sector
A Confederación está composta por 18 Organizacións membro de carácter autonómico ou sectorial emprazadas ó longo de todo o territorio nacional. Cada Federación e cada Asociación integrada promoven, a súa vez, actividades co obxectivo da óptima representación, defensa e protección dos intereses sociais, económicos e profesionais dos seus centros de formación asociados. A este respecto CECAP potencia o espírito de cooperación e solidariedade entre os seus membros e promove actividades para o desenvolvemento cultural e profesional do colectivo encadrado a través da realización de seminarios, publicacións, conferencias, mesas redondas, ...